2Ch 14 | NdeIBE | STEP | Ngakho u-Abhija waya kubokhokho bakhe wembelwa eMzini kaDavida. Indodana yakhe u-Asa wathatha isikhundla sakhe waba yinkosi, njalo ngezinsuku zokubusa kwakhe kwaba lokuthula elizweni okweminyaka elitshumi.

2 Chronicles 14

1 Ngakho u-Abhija waya kubokhokho bakhe wembelwa eMzini kaDavida. Indodana yakhe u-Asa wathatha isikhundla sakhe waba yinkosi, njalo ngezinsuku zokubusa kwakhe kwaba lokuthula elizweni okweminyaka elitshumi.

U-Asa Uba Yinkosi YakoJuda

2 U-Asa wenza okuhle lokulungileyo phambi kukaJehova uNkulunkulu wakhe. 3 Wasusa wonke ama-alithare ezizweni lezindawo zokukhonzela, wadiliza izinsika zakhona lezithombe zikankulunkulukazi u-Ashera.

4 Walaya abakoJuda ukuba bakhonze uJehova uNkulunkulu waboyise, balandele yonke imithetho lemilayo yakhe. 5 Wavala izindawo zokukhonzela lama-alithare empepha kuwo wonke amadolobho akoJuda, ngakho kwaba lokuthula ekubuseni kwakhe. 6 Wakha imizi ebiyelweyo koJuda, njengoba kwakulokuthula elizweni. Kakho owalwa impi laye ngaleyominyaka, ngoba uNkulunkulu wamnika ukuphumula.

7 Wathi kwabakoJuda, “Kasakheni imizi le siyizingelezele ngemiduli, lemithangala, lamasango leminxibo. Ilizwe lilokhu lingelethu, ngoba simfunile uJehova uNkulunkulu wethu; simkhonzile usesilethele ukuthula nxa zonke.” Basebesakha njalo baphumelela.

8 U-Asa wayelamabutho empi ayizinkulungwane ezingamakhulu amathathu koJuda, ayehlome ngamahawu amakhulu lemikhonto, lamanye ayizinkulungwane ezingamakhulu amabili alamatshumi aficamibili koBhenjamini, ayehlome ngezihlangu ezincinyane lamadandili. Wonke kungamadoda alezibindi zokulwa.

9 UZera uMkhushi waphuma ebathukuthelele ephelekezelwa libutho elikhulu lezinqola zokulwa ezingamakhulu amathathu, waze wayafika eMaresha. 10 U-Asa waphuma laye ukuyamjamela, bafika bajama eSigodini saseZafatha phansi kweMaresha.

11 U-Asa wasekhuleka kuJehova uNkulunkulu wakhe wathi: “Jehova, kakho omunye onjengawe ongavikela ababuthakathaka kwabalamandla. Sisize, O Jehova Nkulunkulu wethu, ngoba thina sithembele kuwe, ngebizo lakho siphumile ukuba silwe lalelibutho lempi elikhulu kangaka. O Jehova, unguNkulunkulu wethu; umuntu angezake amelane lawe.”

12 UJehova wawatshaya wawabhuqa amaKhushi phambi kuka-Asa labakoJuda. AmaKhushi abaleka, 13 kodwa u-Asa lamabutho akhe waxotshana lawo waze wayawafikisa eGerari. Kwafa amaKhushi amanengi okokuthi kasazange azame ukuqoqana kutsha; abhuqwa phambi kukaJehova laphambi kwamabutho akhe. Amadoda akoJuda atshuquluza impango enengi kakhulu. 14 Atshabalalisa yonke imizi yaseGerari, ngoba ukuthukuthela kukaJehova kwakuphezu kwayo. Atshuquluza yonke imizi ngoba impango yayinengi kuyo. 15 Ahlasela lezibaya zabelusi abutha imihlambi yezimvu, izimbuzi kanye lamakamela. Asebuyela eJerusalema.